Vieiros

A selección de baloncesto masculino derrotou este venres a Portugal por 70 a 62 (16-15, 20-8, 14-20, 20-19), na primeira das semifinais do Trofeo das Nacións que están a disputar en Xirona (Cataluña).

Os de Diego Ocampo dominaron de principio a fin. Só nos derradeiros minutos, o combinado portugués, que dirixe o ferrolán Moncho López, púxolles as cousas difíciles aos nosos. Mais souberon manter a súa vantaxe no marcador até o final, xogando con serenidade.

Xavier Román, Xosé Antelo, Xosé Ramón Esmorís, Xosé Antonio Vázquez e Vítor de la Fuente conformaron o quintento inicial. Salientou especialmente a actuación de Xosé Luís Castro e de Lucho Fernández, que anotou 17 puntos.

Na final, que comezará este sábado ás 19.00 horas no pavillón Fontajau, a Irmandiña terá enfronte a Euskadi. Os vascos derrotaron por unha estreita marxe (unha canastra de campo) a selección anfitrioa do torneo, Cataluña. O resultado final foi de 79-81.